سارعي يا حروفي للعلا والرشاد
وسطري في بلادي لين تندى السطور

سارعي وازهليني لك زهاب وعتاد
دام ربي خلقني للشعر والشعور

ودام لك يابلادي في فؤادي انفراد
بكتبك وانتِ علمٍ مايسوّره سور

يا عظيمة أحبك والولا بْـ ازدياد
استويتي بعروقي أوّ لك ذي جذور

همت بك وانتِ وادٍ ماهو بـ أيّ واد
في ثراك الثريا وفي سماك البحور

ما انتِ ( ارم ) لكن انتِ ذات فكر وعماد
ساكنك يغرف الغيمه ويقطفْك نور

وفيك ذيك السمان اللي تكفّ الشداد
وفيك ذيك الشداد اللي بعدوك تثور

وانتِ لْكل بلاد .. بلاد يا اطهر بلاد
كنك الشمس في من هي عليها يدور

يكفي ان فيك سولف للحياه الجماد
في عمارك سبقتي حاضرك والعصور

زايرك فيه ينضح .. لك وداد ومراد
تَسْكَنين القلوب وتِسْكِنين الصدور

تغرسين المعرفة والوعي لك حصاد
لين لك صار للتوفيق نهج وعبور

بعد ربي وفضله ربّ كل العباد
سار مُلكك لـ بن عبدالعزيز الجسور

حاكمٍ لك تنعّل في خُطاه السداد
في يسير الامور وفي شديد الامور

بوفهد له على الامجاد صهوة جواد
ممتطي العز يوم العز فيه مخبور

قايدٍ ما لـ ناره جمر ولاّ رماد
ويل للي نوانا في نفاق او شرور

وصقره محمد النادر بعزم وهداد
لا كفخ فوق ولّت عن سماه الصقور

هيلعي له على الاقوال وجهة وكاد
وصيرمي له على الافعال حزم وظهور

كلّ قمه لها بـْ رايه رضى واعتماد
كن لحاله حضور و للبقيه حضور

ويابلادي العظيمة للشعور امتداد
كل جزلة فوصفك يعتريها قصور

▪️ فهد الشدي